ପ୍ରଭୁ ଛନ୍ତି ତୋର ସାହା,
ଆଦେଖା ସିନା ସେ ଉପସ୍ଥିତ ସଦା,
ଦେଖାଉଅଛନ୍ତି ରାହା।
ରଖି ତୋର ଚିତ୍ତ ତାଙ୍କ ଚରଣରେ,
କାର୍ଯ୍ୟ କରୁଥାଅ ନିତ୍ୟ,
ପିତା ସେ ତୋହର ସଦା ହିତକାମୀ,
ହୁଅ ତାଙ୍କ ପ୍ରତି ସତ୍ୟ ।
ଯୋଡି ଚାଲୁ ଇଟା ଅସ୍ଥାୟୀ ବାସରେ,
ଲଗାଇ ବୁଦ୍ଧି କୌଶଳ,
ସେ ଘରକୁ ଖଣ୍ଡେ ଇଟା ଯୋଡିବାକୁ,
ନାହିଁ ତୋ ପାଖରେ ବେଳ ।
ଚାରିଦିନ ପରେ ଘରକୁ ଫେରିବୁ,
ଚିନ୍ତ ସେ ଘରର କଥା
ପଡି ରହିଯିବ ପାର୍ଥିବ ସମ୍ପଦ,
ସମ୍ବନ୍ଧ, ସୁଖ ଓ ବ୍ୟଥା ।
ମାଟି ସବୁ ଦିନେ ମାଟିରେ ମିଶିବ,
ଛାଡ଼ିବୁ ଯେବେ ତୁ ଦେହ,
କର୍ମ ଏକା ଆତ୍ମା ସଙ୍ଗତରେ ଯିବ
ସେଥିକୁ ସତର୍କ ରହ।
